ROXAS CITY – Isa kritikal, 2 pilason matapos nagbunggu-anay ang isa ka top down nga tricycle kag Wingvan truck sa Brgy. Bailan, Pontevedra, Capiz.
Ginkilala ang driver sang top down nga si Roben Bulaklak, 19-anyos residente sang Brgy. Tabuk samtang ginkilala ang duwa ka pasahero sini nga sanday Patricia Dangan, 19-anyos residente sang Brgy. Bailan kag Anamae Distura sang Brgy. Rizal sang nasambit nga banwa.
Samtang ang driver naman sang Wing van ang ginkilala kay Gerald Estrella yara sa legal nga pang-edaron, negosyante kag residente sang Brgy. Concencia, Iloilo.
Sandig sa imbestigasyon sang Pontevedra Municipal Police Station, nga nagikan sa Estancia si Estrella sakay sa ginamaneho sini nga Wing van truck padulong sa syudad sang Roxas samtang ang top down nga tricycle ang nagikan sa Brgy. Rizal kag magapadulong kuntani sa proper sang nasambit nga banwa sang hinali nga nadulaan sang kontrol sa pagmaneho si Bulaklak rason nga dumaretso ini sa kasugata nga truck.
Bangud sa impact sang pagkabunggo, ginpadangat sa Iloilo Hospital si Bulaklak kag sa karun yara sa kritikal nga kondisyon samtang ang duwa ka babayi nga pasahero sini ang pilason kag padayon nga ginabulong sa Bailan District Hospital.
Ginkustodiya sang Pontevedra MPS ang duwa ka imbolbado nga salakyan kag ang driver sang van nga si Estrella nga natalana man nga i-release kun matapos na ang imbestigasyon sang mga kapulisan.
