Ginkumpirmar sang Department of Migrant Workers (DMW) nga natalana nga maga-abot sa pungsod subong nga gab-i, Sabado, Hulyo 12, ang dugang nga 11 ka mga Filipino seafarers nga na-rescue gikan sa naglugdang nga MV Magic Seas matapos gin-atake sang mga rebelde nga Houthi.
Sa isa ka press conference subong nga adlaw, ginpahayag sang DMW USec. Bernard Olalia, ang 11 ka crew ang nalakip sa 17 ka mga narescue nga Pinoy seafarers.
Ginalauman nga magahugpa sa Ninoy Aquino International Airport (NAIA) ang eroplano nga may sakay nga 11 ka crew.
Magabaton man sila sang bulig gikan sa gobyerno.
Sini nga Biernes sang gab-i, Hulyo 11, una nga nag-abot ang anum ka mga Pinoy nga tripulante sang MV Magic Seas. Kalakip na ang chief officer sang barko, 2nd officer kag 3rd officer nga nag-abot sa NAIA Terminal 1 samtang ang iban ang yara sa Clark International Airport.
Nakabaton sila sang tig-P75, 000 gikan sa AKSYON Fund sang DMW kag Emergency Repatriation Fund sang OWWA kag tag-P10,000 gikan sa DSWD.
Matandaan nga ginsalakay sang mga rebelde nga Houthi ang Liberia-flaged vessel nga MV Magic Seas samtang ini ang naga-agi sa Red Sea rason nga naglugdang ini sang Hulyo 6, apang maswerte nga naluwas ang tanan nga 22 ka crew nga sakay.
