Nagbayluhanay sang inumok ang duha ka lalaki sa atubang mismo sang mga kapulisan sa binaylehan sa Barangay Malapad Cogon, Sigma, Capiz.
Ginkilala ang mga nagkaladakpa nga sanday alyas “Bayot”, yara sa legal nga pang-edaron kag residente sang Brgy. Mianay, kag si alyas “Boy”, 44-anyos kag residente naman sang Brgy. Malapad Cogon sa nasambit nga banwa.
Sa nakuha nga impormasyon sang Bombo Radyo nagikan sa Sigma MPS, ginpahayag nga may nagluntad nga indi pag-intindihanay sa magtimbang nga bahin sa binaylihan.
Apang, wala nagdugay may nagluntad na nga bayluhanay sang inumok sa magtimbang nga bahin sa atubang atubang mismo sang mga kapulisan rason nga gilayon nga gindakop ang mga ini.
Nahibaluan, yara sa impluwensya sang makahulubog nga ilimnon ang nasambit nga mga persona.
Sa karon, nagapabilin ang mga ini sa kustodiya sang Sigma MPS kag magapangatubang sa kaso nga Disobedience to a Person in Authority or the Agents of such Person.
