ROXAS CITY – Arestado ang duha ka mga persona sa ginkasa nga drug buybust operation sang Station Drug Enforcement Team sa Atila Balgos St., Barangay Banica Roxas City.
Ginkilala ang mga nadakpan nga sanday Jomer Durana 33 anyos, kag Wilfredo Agudo 29 anyos, lunsay residente sang nasambit man nga barangay.
Nakuha sa posesyon kag kontrol sang duha ka mga suspetsado ang 6 ka mga plastic sachets nga ginapatihan shabu, isa ka unit sang cellphone kag P1000 nga marked money.
Suno kay Police Master Sergeant Ramil Arcangeles nga drug surrenderer si Durana sang barangay Banica samtang newly-identified drug personality naman si Agudo.
Masobra duha ka semana nga gin-monitor sang SDET ang duha ka mga persona nga masami naga transaksyon sa amo nga lugar.
Gindugang pa ni Arcangeles nga yara sa watchlist si Durana kag Agudo nga nagapakig-transaksyon sa ila mga parokyano pinaagi sa group chat sa messenger.
Samtang ginkumpirmar ni Barangay Kapitan Victor Dolor nga kilala sa pagduso sang ilegal nga droga si Durana sa Barangay Banica samtang si Agudo ang bag-uhanon lamang sa ila ilegal nga aktibidad.
Natalana nga pasakaan sang panumbungon nga paglapas sa R.A. 9165 ukon Comprehensive Dangerous Drugs Act of 2002 ang duha ka mga suspetsado.
