ROXAS CITY- Ginatudlo nga supplier sang druga sa probinsya sang Aklan ang duha sa apat nga nadakpan sa drug buybust operation sa tingub nga pwersa sang Philippine Drug Enforcement Agency (PDEA) Capiz kag Aklan sa Railway Street, Barangay Punta Tabuc, Roxas City.
Ini ang ginpahayag ni IA3 Jose Ramir Batuigas, Assistant Provincial Officer sang PDEA-Aklan sang mainterview sang Bombo Radyo.
Suno kay Batuigas, ba-se sa pahayag sang mga drug suspects nga nadakpan sa Aklan, nagakuha ang mga ini sang druga sa Capiz pinaagi kay Ryan Tiempo kag Ralph Aninacion Losanta.
Bangud sa nakuha nga impormasyon, ma-id-id nga ginmonitor sang mga otoridad ang hulag sang duha sa sulod sang kapin isa ka bulan.
Wala naman napaslawan ang PDEA sa ila operasyon bangud nadakpan sa akto nga nagagamit sang iligal nga druga ang apat ka lalaki nga sanday Tiempo, Losanta, Rex Jimenez kag Mark Delco.
Gintuad pa ni Batuigas nga drug den ang nasambit nga lugar kag makabig nga street level lang ang nadakpan.
Dugang pa sang opisyal nga mas pasangkaron pa nila ang kampanya agud madakpan ang dalagkuan nga source sang iligal nga druga.
Nagapanawagan naman ini sa mga indibidwal nga nagagamit sang druga nga untaton na ang iligal nga buluhaton bangud ginaguba sini ang ila pamilya kag buas damlag sang mga kabataan.
