ROXAS CITY – Arestado ang tatlo ka mga maghimata nga mga mangunguma nga sakay sa motorsiklo matapos nga nagpalagas sa mga kapulisan kag nakuhaan sang armas-luthang, sa Barangay Cabugao, Roxas City.
Ginkilala ang mga gindakop nga sanday Jonathan Jarce, 38-anyos; Herman Jarce, 49-anyos kag Erwin Jarce, 39-anyos nga mga residente sang Barangay Amaga, Sigma, Capiz.
Sa impormasyon nga nakuha sang Bombo Radyo sa Roxas City Police Station, nahibaluan nga alas-8:55 kagab-i sang Marso 2, sang nagapatigayon sang checkpoint ang mga katapo sang 1st Maneuver Platoon, 1st Police Mobile Force Company sa Brgy. Lonoy, sini nga syudad, sang naglikaw kag nagpalagas ang motorsiklo nagaduag orange nga ginamaneho ni Erwin.
Sang ulihi, nadakpan ang mga ini kag narekober sa kustodiya ni Herman ang isa ka unit sang .45 pistol may magazine kag apat ka mga bala.
Sa karon, yara ang mga ini sa kustodiya sang Roxas City PNP kag natalana nga pasakaan sang kaso nga paglapas sa RA 10591 ukon “Comprehensive Firearms and Ammunition Regulation Act.”
