ROXAS CITY – Pilas ang naangkon sang tatlo ka mga indibidwal matapos ang nagluntad nga aksidente sa Barangay Bunga, Mambusao, Capiz.
Ginkilala ang biktima nga si Ruel Ubales Venerable, 32-anyos kag angkas sini nga si Zosimo Barrientos Dasal, 62-anyos lunsay mga residente sang Barangay Pangabuan, Jamindan, Capiz.
Samtang ang ginatudlo driver/suspect ang ginkilala kay William Apora Magtolis, 67-anyos retired member sang Philippine Army holder kag residente sang Barangay Tawog, Sigma, Capiz.
Sa impormasyon nga nagikan sa Mambusao Municipal Police Station, ginapahayag nga samtang ginasubay sang mga biktima ang dalan sakay sang Honda TMX nga motorsiklo nagikan sa Roxas City kag papauli na kun tani, apang pag-bot sa may kurbadahon nga porsyon sang dalan sa Brgy. Bunga, Mambusao, Capiz aksidente ini nga nabungguan sang Honda RS nga motorsiklo nga ginamaniho sang driver/suspect nga nagikan naman sa banwa sang Jamindan kag papauli naman kun tani.
Ginapahayag nga nadulaan sang kontrol sa iya pagmaneho si Magtolis.
Bangud sa natabo, nag-angkon ang mga ini sang pilas sa magkatuhay nga parte sang ila lawas nga madasig naman ginrespondihan sang katapo sang Jamindan Rescue Unit (JRU MDRRMO, Jamindan, Capiz) kag Mambusao Emergency Rescue Unit (MERU MDRRMO, Mambusao, Capiz) agud dapatan sang pauna nga pagbulong antes ginpadangat sa ospital.
