ROXA CITY – Pilas ang naangkon sang 3 ka mga persona, matapos ang nagluntad nga aksidente sa Brgy. Bolo, Roxas City 1:19 sang hapon Marso 31, 2024.
Ginkilala ang mga ini nga sanday Joel Tristan 20-anyos, residente sang Barangay Punta Tabuc, Roxas City, Mario Ariz 57-anyos residente sang Sitio Nasagud, Barangay Lanot, Roxas City, Rogelio Fuentes 36-anyos construction worker, kag Fredie Santiago 34-anyos lunsay residente sang Barangay Jumaguicjic, Roxas City.
Sa impormasyon nga nakuha sang Bombo Radyo sa Roxas City PNP, ginapahayag nga samtang ginasubay ni Fuentes ang dalan nagikan sa city proper kag padulong kun tani sa Barangay Lanot sakay ang ginamaneho sini nga Mitsukoshi nga tricycle kaupod ang pasahero sini nga si Santiago, apang pag-abot sa lugar kun sa diin nagluntad ang aksidente nadulaan ini sang kontrol sa pagmaneho.
Bangud sa natabo, nagliko ini padulong sa pihak nga linya kag aksidente nga nabungguan ang kasugata nga Suzuki Celerio nagaduag gray nga ginamaneho ni Tristan.
Naulamid man ang tricycle nga nakaparking sa higad nga dalan kung sa diin nagapungko si Ariz.
Nag-angkon ang mga ini sang pilas sa magkatuhay nga parte sang ila lawas kag madasig nga ginrespondihan sang katapo sang Bureau of Fire Medical Team agud dapatan sang pauna nga pagbulong antes ginpadangat sa magkatuhay nga ospital sa syudad.
Sa karun yara sa kustodiya sang Roxas City PNP ang tricycle ni Fuentes para sa nagakaigo nga disposisyon.
