ROXAS CITY – Ginpasakaan na sang kaso sa paglapas sa Republic Act No. 9165 ukon ‘Comprehensive Dangerous Drugs Act of 2002’ ang 37-anyos nga lalaki nga nadakpan sa drug buy-bust operation sa Brgy. Rosario, Pilar, Capiz.
Matandaan nga ginkilala ang arestado kay Michael Bernas kag residente sang Brgy. Dulangan, sa nasambit nga banwa.
Ginkasa ang drug buy-bust operation sang gintingub nga puwersa sang mga katapo sang Provincial Police Drug Enforcement Unit (PPDEU), Station Drug Enforcement Team (SDET) Pilar kag Philippine Drug Enforcement Agency (PDEA) 6.
Nakuha sa kontrol kag posesyon ni Bernas ang duha ka sachets sang suspected shabu, Yamaha nga motorsiklo, kag P3,500 bilang buy-bust money.
Sa karon, nagapabilin ini sa kustodiya sang Pilar MPS para sa nagakaigo nga disposisyon.
