39 anyos nga lalaki, nagparekord sa pulisya matapos gintapungol sang kaupod sa trabaho sa Barangay Banica

ROXAS CITY – Nagparekord sa Roxas City Police Station ang isa ka 39 anyos nga lalaki matapos ginaalegar gintapungol sang iya kaupod sa trabaho sa New Road, Barangay Banica, Roxas City.

Ang tagreklamo ang ginkilala nga si Lucas Macahilig, residente sang Kalibo, Aklan kag ang ginareklamo sini amo si Arnel Bugo.

Base sa reklamo ni Macahilig, nag-abot siya sa ila ginatrabahuan kag didto iya ginpamangkot si Bugo kun bastante pa ang ila nga stocks.

Apang sa iya kakibot, ginbuyayaw siya sini kag hinali na lamang nga gintapungol rason nga nag-angkon siya sang bukol sa ulo.

Bangud diri, ginpakamaayo na lamang ni Macahilig nga iparekord sa pulisya ang natabo.