ROXAS CITY — Patay ang apat ka persona kalakip ang suspek samtang duha ka iban pa ang pilason, matapos ini nga mag-amok kag ginpanglabo ang iya nga masugata sa karsada kag ginsulod pa ang isa ka balay kag ginpanglabo ang isa ka pamilya sa Barangay Tanza Dulunan, Panay, Capiz.
Natiruhan-patay sang nagresponde nga mga pulis ang suspek nga si Nestor Beldia, 60-anyos, residente sang nasambit nga barangay matapos nga ginaalegar magbato sang dakpon sang mga kapulisan.
Ginkilala ang mga napatay nga biktima nga sanday Concepcion Celino, 70-anyos; anak sini nga si Ramilyn Labto, 31-anyos kag apo nga si Jeralyn, apat ka tuig ang edad kag lunsay mga residente sang nasambit nga barangay.
Pilason naman ang duha ka iban pa nga sanday Thelma Arabia, 72-anyos kag menor-de-edad nga si Hanafel nga ginabulong karon sa Roxas Memorial Provincial Hospital.
Ba-se sa impormasyon nga nakuha sang Bombo Radyo Roxas, nagapanggahit sang mga linghot sa iya nga ulumhan ang suspek nga si Beldia apang sang nagpauli na kasubong nga wala na ini sa iya husto nga kaisipan kag ginpanglabo sanday Arabia kag Hanafel nga iya nasugatan sa karsada.
Wala pa nakuntento si Beldia, ginsulod sini ang isa ka balay sa diin nagaestar sanday Concepcion, Labto kag Jeralyn kag ginpanglabo ang magpamilya nga lunsay nag-angkon sang patal nga mga pilas sa lawas kag gindeklara nga dead on arrival sa Health Centrum Hospital sa syudad.
Sa karon nagapadayon ang imbestigasyon sang mga katapu sang Panay Municipal Police Station sa nasambit nga insidente.
