Matapos ang pagbubo sang makusog nga ulan kag malain nga tyempo, nagbalik na sa tagsa ka mga puluy-an ang pila ka mga indibidwal nga nag-evacuate sang tinalikdan nga adlaw sang Martes, Oktubre 22 sa pila ka kabarangayan sa banwa sang Pilar.
Sa interview sang Bombo Radyo kay Mr. Mark Bulaqueña, Undertraining Assistant Head-MDRRMO Pilar, ginpahayag nga naglab-ot sa kapin 20 ka pamilya ukon 62 ka mga indibidwal ang una nga nagbakwit sa Barangay San Nicolas, San Pedro, Binaobawan, kag Sinamongan.
Apang, matapos ang pagpanglaslas sang makusog nga ulan kag malain nga tyempo nga dala sang Bayong Kristine, nagbalik na ang mga ini sa tagsa sini ka mga panimalay.
Dugang pa ni Bulaqueña, naghubas naman ang baha sa tanan nga mga kabarangayan sa nasambit nga banwa.
Mahibaluan, nga nagbilin sang halit ang Bagyong Kristine nga kun sa diin apat ka mga sakayan pandagat ang naguba sa Barangay Natividad kag isa naman ka balay ang nasamad sa Barangay Sinamongan.
Sa karon, apisar nga maayo na ang panyempo, padayon sa gihapon nga nakaalerto ang Pilar Municipal Disaster Risk Reduction and Management Office (MDRRMO) bangud sa pamahog nga dala sang bagyo Kristine.
