Nangin madinalag-on ang ginpatigayon nga drug buybust operation sang mga kapulisan sa Brgy. Kinalkalan, Balasan, Iloilo.
Ginkilala ang nadakpan sa kay alyas Jopet’ 40 anyos kag residente sang Barangay San Nicolas, Pilar, Capiz.
Sa interview sag Bombo Radyo kay Police Captain Renzo Martinez, Hepe sang Balasan MPS yara sa Top 1 drug priority watchlist ang amo nga subject person sa banwa sang Pilar. Dugang pa ni PCapt. Martinez High Value Individual (HVI) ang amo nga arestado sa pagduso sang iligal nga droga sa ila nga banwa.
Nakuha sa posesyon sang suspetsado ang 7 tanan ka sachet sang gina-alegar nga iligal nga droga nga may kabug-aton nga mas ukon menus 890 gramos kag may standard drug price nga Php 6,058,000.00 , kag 50, 000 pesos nga buybust money sa magkalain lain nga denominasyon kag natigayon nga madakpan pinaagi sa pulis nga nagpakuno-kuno poseur buyer.
Mahibaluan nga yara sa sulod sang anum ka bulan ang monitoring sang mga otoridad sa subject person sa iya sini nga mga ilegal nga buluhaton kung sa diin nagresulta sa isa ka madinalag-on nga buybust operation.
Kaso nga paglapas sa RA 9165 ukon Comprehensive Dangerous Drugs Act of 2002 ang paga-atubangon sang nasambit nga nadakpan.
Sa karun, yara na sa paghinakop sang Balasan MPS ang nadakpan para sa nagakaigo nga disposisyon.
