ROXAS CITY – Makatilingala sa lima ka mga Barangay Healthworkers (BHW) nga taga Brgy. Cogon sini nga syudad nga wala ang mga ini nakabaton sang cash incentives nagikan sa city government apisar rehistrado nga mga healthworkers sa City Health.
Sa pakig-angut sang Bombo Radyo kay Cherefel Acdal, ginkakibot sini nga wala siya nadala sa listahan bangud nakabaton man ini sang P1,000 nga insentibo sang nanligad nga tuig nga para man sa mga BHW’s.
Suno diri, wala ini sang may madumduman nga rason kun nga-a ginkakas ang iya pangalan bangud aktibo man ini kag ginahimo sang insakto ang trabaho.
Ginpalab-ot niya na ang reklamo sa ila lider kag ginsuhestyon nga apisar wala sa listahan magtambong sa amu nga tagtaganay.
Apang ginkalain lang sini sang buot nga nahapunan na ini sang hulat wala gid si Acdal sang may nabaton.
Suno naman kay Rosemyr Billiones, sa anum ka tuig nga pagserbisyo niya bilang BHW ini ang una nga kahigayunan nga wala siya nakabaton sang insentibo.
Palamangkutanon kay Billiones kun ano ang nangin basehan agud dulaon ang ila pangalan sa lista.
Dugang pa sini, sa kadugayon sang ila pagserbisyo sila pa ang wala nakabaton kag sa baylo nahatagan ang mga 3 ka mga volunteer workers nga indi pa rehistrado.
Samtang, ginsuhestyonan sang lider nga magpanagyo sang recommendation sa ila Punong Barangay kag igapasa sa City Mayor Office.
