ROXAS CITY – Nag-angkon sang pilas ang tag-iya sang balay nga ginsulod sang duha ka mga kawatan sa Barangay Cagay, Roxas City, Capiz.
Ang balay ang ginapanag-iyahan ni alyas Terry, 53-anyos kag residente sang San Lorenzo Village, Brgy. Cagay, Roxas City, Capiz.
Sa pagpakig-angut sang Bombo Radyo kay PCMS Ramil Arcangeles, PIO PNCO sang Roxas City Police Station, ginapahayag sang biktima nga duha ka persona ang nagpakilala nga food delivery rider. Isa ka lalaki kag isa ka babaye.
Apang, ginkakibot nalang sang biktima tungod wala man sang may nag-order sang pagkaon, apang ginhambal naman sang mga suspek, nga ang order ang nagikan sa bata sang amo nga biktima.
Sang ginbuksan na sang biktima ang gate, gilayon nga ginpwersa kag gintutukan sang kutsilyo sang suspek nga babayi kag gindala sa sulod sang ila nga puluy-an.
Diri na nagsugod nga mamukad ang mga suspetsado kag ginpwersa ang biktima nga maghatag sang kwarta sa mga ini. Sa kakulba sang biktima, gilayon man nga ginhatag sini sa mga suspek ang duwa sini ka mga wallet.
Nakuha sang mga suspek ang menos ukon sobra sa 35,000 pesos nga balor sang kwarta kag nataban man ang mga alahas nga nagabalor sang menos ukon sobra 30,000 pesos.
Ang wala matumod nga mga suspek ang madasig nga nakapalagyo matapos natigayon ang pagpangawat.
Sa karon, padayon pa ang imbestigasyon sang mga kapulisan kag nagapatigayon naman ang mga ini sang hot pursuit operation agud matumod ang nasambit nga mga suspetsado.
