CUARTERO, CAPIZ – Nakuha sa posisyon sang 55-anyos nga mister ang tatlo tanan ka armas-luthang matapos ang gin-implementar nga search warrant sang Cuartero PNP sa Sitio Takas, Barangay Nagba, Cuartero, Capiz.
Sa impormasyon nga nagikan sa Cuartero Municipal Police Station, ginkilala ang subject person nga si alyas Dodoy kag residente sang nasambit nga lugar.
Ginpapanaog ang search warrant ni Hon. Judge Lorencito Belo Diaz, Executive Judge, Regional Trial Court, Hall of Justice, Roxas City nga napetsahan Marso 31, 2025 may kaangtanan sa paglapas sa RA 10591 ukon ang Comprehensive Law on Firearms and Ammunition Regulations Act.
Narekober sa balay ni alyas “Dodoy” ang isa ka yunit sang 12 Gauge Homemade Shotgun chamber with magazine nga loaded sang bala, isa ka yunit sang 12 gauge homemade shotgun with magazine nga loaded sang bala kag isa ka yunit sang caliber . 38 revolver Magnum NDEP nga may tatlo ka bala.
Sa karon ang suspek kag ang mga narekober nga armas-luthang ang yara na sa kustodiya sang kapulisan para sa nagakaigo nga disposisyon.
