Pilason ang anum ka mga indibidwal matapos magbungguanay ang duha ka motorsiklo sa sa Barangay Vizcaya, President Roxas, Capiz.
Ang mga biktima amo sanday Sandro Rico, 41 anyos, driver sang motorsiklo, upod ang duha niya ka sakay nga nagabusong kag residente sang Sitio Lonok, Brgy Vizcaya, President Roxas, Capiz, samtang ang driver naman sang isa ka motorsiklo amo si James De Mayo 16 anyos, nga may upod man nga pasahero kag residente sang Brgy. Duluan, Maayon, Capiz.
Sa inisyal nga impormasyon nagikan sa President Roxas Municipal Police Station, ginpahayag nga padulong sa banwa sang Pontevedra ang motorsiko nga ginasakyan ni Sandro sang hinali na lang ini nga ginbunggo sa likod sang motorsiklo ni James.
Bangud sa mabaskog nga impact, nag-angkon sang pilas sa magkatuhay nga parte sang lawas ang mga biktima nga gilayon naman nga ginrespondihan sang mga katamo sang MDRRMO President Roxas kag gilayon naman nga ginpadangat sa Ospital.
Sa subong, yara na sa kustodiya sang President Roxas Municipal Police Station ang duha ka motorsiklo para sa nagakaigo nga disposisyon.
