ROXAS CITY – Nagpabalhag sang reklamo ang isa ka 60 anyos nga ginang matapos nga ginaalegar gintiplang sang isa ka ticketing employee sa isa ka ticketing office sa Roxas City Integrated Transport Terminal sa Pueblo De Panay Barangay Lawaan, Roxas City.
Sandig sa ginpabalhag ni Lilian Teodore, sang Barangay Punta Tabuc sining siyudad nga nagpadulong ini sa nasambit nga ticketing office sang nakaligad nga Marso 14 sining tuig agud mag-inquire sang biyahe padulong sa Manila sa masunod nga adlaw, Marso 15.
Nahibaluan nga ginpasiguro ni Alyas Joe, isa ka empleyado sang nasambit nga ticketing office nga may yara sang biyahe kag nagsuhestiyon pa nga dal-on sang tagreklamo ang bagahe sini alas singko sang aga pagkasunod nga adlaw agud malikawan ang pagka-delay sini.
Gintuman man sang tagreklamo ang nasambit nga pahayag kag gilayon nga nagbakal sang isda nga nagabalor sang P4,776 nga pagadal-on kuntani sa iya utod sa Manila.
Apang sang ini na ang nagpadulong sa terminal sang Marso 15 diri lang nahibaluan nga kanselado na ang biyahe kag wala sang biyahe padulong sa Manila.
Bangud diri, ginpakamaayo na lamang sang tagreklamo nga iparekord sa pulisya matapos nga wala nagpakita ang persona nga nagpakilala nga empleyado sang nasambit nga ticketing office.
