ROXAS CITY-Ginkompimar sang alkalde sa banwa sang Pontevedra nga may yara isa ka napatay nga indibidwal nga nagpositibo sa Coronavirus Disease ukon COVID-19.
Base sa ginpaguwa nga official statement ni Mayor Esteban Contreras nga isa ka 67-anyos nga lalaki nga residente sang Barangay Bailan sang amo nga banwa ang nagpositibo sa amo nga balatian.
Wala ini sang history of travel sa mga lugar nga infected sa COVID-19 kag wala man sang exposure sa mga nagpositibo sa amo nga sakit.
Dugang pa ni Contreras nga masobra isa ka semana nga ginaubo ang nasambit nga indibidwal kag nakabatyag sang kabudlay sa pagginhawa rason nga gindala ini sa Bailan District Hospital apang gilayon man ginsaylo sa RMPH.
Ginpaidalom ini sa RT-PCR tests apang ginbawian man gilayon sang kabuhi.
Padayon naman ang hugot nga contact tracing sang mga otoridad sa mga indibidwal nga naka-close contact sa mga nagpositibo.
Nahibaluan nga sandig man sa ginpaguwa nga datos sang PHO ang amo nga indibidwal ang nagpositibo sa nasambit nga balatian kag nagdugang sa numero sang narekord nga nga indibidwal nga napatay bangud sa nasambit nga balatian.
