ROXAS CITY – Nakasentro sa ‘against all odds’ relationship ang ambahanon nga ‘Answered Prayer’ nga isa sa napilian bilang semifinalist para sa Bombo Music Festival 2020.
Ini ang ginpahayag sang Capizeña composer nga si Cel Shama Cabarles, sang Mckinley Ilaya, Roxas City sang mainterview sang Bombo Radyo Roxas.
Suno kay Cabarles, halos lima ka tuig na nga nakatago ang iya komposisyon nga gikan sa isa ka tula, gin-arrange sang iya nga partner nga isa ka music teacher.
Ginpahayag sini nga malapit sa iya ang amo nga komposisyon bangud nagalaragway ini sang iya personal nga eksperyensiya pag-abot sa paghigugma.
Luyag nga ipalab-ot sang ambahanon nga ang isa ka manami nga ‘love story’ ang nagaagi sa proseso.
Suno kay Cabarles nga madamo sang maka-relate sa nasambit nga ambahanon bangud istorya ini sang paghigugma nga nagsugod sa pag-abyanay.
Tuman ang pagpasalamat ni Cabarles matapos malakip sa mga semifinalists kag nagalaum nga makaabanse ini sa Top 12 grand finalists sang Bombo Music Festival 2020.
