ROXAS CITY – Ginpasakaan sang kaso sang Capiz Environment and Natural Resources Office (CaPENRO) si Mambusao Mayor Leodegario Jun Labao Jr. bangud sa ginapahayag partisipasyon sini sa illegal quarry operation sa Barangay Manhoy, Dao, Capiz.
Ini ang ginkompirmar mismo ni CaPENRO Head Atty. Emilyn Depon sa interview sang Bombo Radyo Roxas.
Matandaan nga nadakpan sang Task Force Kabalaka 6K at sang mga katapu sang CaPENRO ang isa ka backhoe kag truck nga ginapanag-iyahan sang alkalde nga nagapatigayon sang illegal quarrying sa nasambit nga lugar.
Bangud diri ginpasakaan sang ahensiya ang alkalde sang kaso nga paglapas sa Republic Act 7942 kag Ordinance 11-2017 ukon ang Revised Revenue Code of the Province of Capiz.
Ginpasakaan man si Labao sang kaso nga paglapas sa Presidential Decree 1829 ukon Obstruction of Apprehension and Prosecution of Criminal Offenders matapos ginpatung-an sini kag ginpunggan ang operasyon sang CaPENRO.
