Boluntaryo nga nagsungka kay Tapaz Municipal Mayor Roberto Palomar ang isa ka babaye nga nagpakilala nga anay katapo sang Communist Terrorist Group (CTG).
Sa nakuha nga impormasyon nga nagikan sa 12th Infantry “Lick Em” Battalion 3ID PA, ginapahayag nga nagpadulong sa talatapan sang alkalde ang wala na ginhingadlan nga persona nga ginapahayag nga anay myembro sang Communist Terrorist Group (CTG) kun sa diin, isa ini ka Organizer/Medic sang Armadong Yunit Propaganda (AYP) sa idalom sang Central Front Komite, KR-Panay, sumugod Abril 1978 tubtob Nobyembre 8, 2013.
Dugang pa nga nagdesider ini nga magsungka sa otoridad kag untatan na ang pagsuporta sa rebelde nga grupo bangud nareyalisar sang surenderee nga madugay na ini nga ginatiplang sang NPA.
Kasunod sang pagsungka, gin-serbihan naman ini sang Warrant of Arrest sang Tapaz PNP sa kaso nga murder nga gingamitan sang indi lisensyado nga armas-luthang, kun sa diin wala ini sang pyansa, kag two counts rebellion, kun sa diin may pyansa naman nga ginrekomendar nga nagabalor P40,000 sa kada kaso.
Natigayon kag nangin madinalag-on ang iya pag-surrender pinaagi man sa gintingub nga pwersa sang Tapaz Municipal Police Station, Provincial Intelligence Team-Capiz, 602nd Company, Regional Mobile Force Battalion 6 (RMFB6), 12th Infantry Battalion (12IB), 3rd Infantry Division (3ID), Philippine Army (PA), 31st Military Intelligence Company (31MICO), 3rd Military Intelligence Battalion (3MIB), 2nd Capiz Provincial Mobile Force Company (PMFC), kag Capiz Provincial Police Office- Provincial Investigation Unit (PIU).
Sa karon, yara na ini sa paghinakop sang Tapaz PNP para sa nagakaigo nga disposisyon.
