Boluntaryo nga nagsungka sa kapulisan sang Cuartero ang isa ka lalaki nga nagpakilala nga anay katapo sang Communist Terrorist Group (CTG).
Sa impormasyon nga nakuha sang Bombo Radyo nagikan sa Cuartero Municipal Police Station, ginpahayag nga nagpadulong sa ila istasyon ang wala na ginhingadlan nga persona kag suno diri, nagsulod ini sa organisasyon sang tinalikdan nga tuig 2015 tubtob 2022.
Dugang pa nga nagserbe man ini bilang aktibo nga miyembro sang NPA’s SPP East KR-Panay sa idalom sang pagpamuno ni Romulo Gangoso, alias “Ka Reagan.
Nagdesider ini nga magsungka sa otoridad kag untatan na ang pagsuporta sa rebelde nga grupo bangud nareyalisar sini nga madugay na ini nga ginatiplang sang NPA.
Kadungan sang iya pagsungka, ginsurrender man sini ang isa ka unit sang homemade 12-gauge shotgun nga wala sang bala.
Sa karon, yara na sa paghinakop sang Cuartero MPS ang nasambit nga armas-luthang kag persona para sa nagakaigo nga disposisyon.
