IVISAN, CAPIZ- Ginpatpat sang katapo sang Municipal Environment and Natural Resources Office-Ivisan ang kahulugan kag sistema sang Arbor Day sa Pilipinas.
Sa interview sang Bombo Radyo kay Ms. Clyde Villareal, Municipal Environment and Natural Resources Officer sang Local Government Unit-Ivisan, iya ginpahayag nga sa idalom sang Presidential Proclamation No. 643 kag Republic Act 10176 ukon ang Arbor Day Act of 2012, ginasaulog ang Arbor Day kada Hunyo 25 sa Pilipinas. Katuyuan sang adlaw nga ini nga maghatag sang mensahe sa importansya sang mga puno kag katalunan sa dunang manggad kag pagpangabuhi.
Dugang pa sini, sandig sa Republic Act 10176, ginaganyat ang tanan nga mga pumuluyo, nagikan sa mga pribado nga sektor kag pampubliko nga institusyon nga aktibo nga magpartisipar sa mga programa ng pagtanom sang puno kag pag-amlig sa mga kataluanan. Ang nasambit nga layi nagaduso sang isa ka dako nga kampanya para sa pagpalapad sang ihibalo hanungod sa importansya sang kakahuyan sa pagpabilin sang ekosistema kag katahom sang planeta.
Nahibaluan nga sa tagsa pagsaulog sang Arbor Day, ginahatagan importansya ang mga aktibidad kaangay sang tree planting kag forest conservation agud mapabilin ang isa ka sustainable nga palibot para sa mga masunod nga henerasyon. Ini man ang kahigayunan agud mapahanunduman ang publiko nga ang mga puno indi lang nagahatag sang malimpyo nga hangin, kundi may papel man sa pagbuhin sang epekto sang climate change kag paglikaw sa mga kalamidad.
Samtang, nagapasalamat naman si Ms. Villareal sa mga partners agencies, mga nakapangtanom na, kag sa mga manogtanom palang sang kahoy, agud nga mapabilin nga maanyag ang palibot kag dunang manggad para sa mga masunod nga henerasyon.
