(UPDATE) – Ginpahayag sang mga katapo sang kapulisan nga away sa duta kag daan nga hiligut-anon ang motibo sang suspek sa pagluthang sa biktima sa Barangay San Esteban, Pilar, Capiz.
Matandaan nga ginkilala ang biktima kay Emmuel Matillano samtang ang suspek ang ginkilala kay alyas ‘Edoy’ Bacanto lunsay residente sang nasambit nga lugar.
Nahibaluan nga natabo ang pagpangluthang kahapon sang hapon, Hunyo 12, kun sa diin samtang nagasakay sa iya motorsiklo ang biktima kaupod ang utod nga si Jhon Paul Matillano, nagpundo ang mga ini sa balay sang suspek matapos nga may nakabangga sa dalan.
Sa pagkumpronta sang biktima sa suspek, hinali ini ginluthang sang maka-pito ka beses gamit ang armas-luthang nga wala marekober sang kapulisan, kag naigo sa magkatuhay nga parte sang iya lawas.
Nagpalagyo ang suspek matapos ang insidente nga tubtob sa karon wala pa mahibaluan ang ginahamtangan.
Gintransfer man ang biktima sa isa ka pribado nga ospital sa Iloilo nagikan sa Bailan District Hospital para sa nagakaigo nga pagbulong.
