ROXAS CITY – Nagpadala na sang meat sample sang nagkasari-sari nga panginhason ang Provincial Agricultural Office-Capiz sa central office laboratory sang Bureau of Fisheries and Aquatic Resources (BFAR) nga nahamtang sa syudad sang Manila bilang confirmatory test sa ginapahayag red tide.
Ini ang ginsiling ni Mrs. Sylvia Dela Cruz, Provincial Agriculturist-Capiz sang ma-interview sang Bombo Radyo.
Ang ginpaguwa nga public advisory isa ka precautionary measure agud indi na magdamo pa ang posible mabiktima, apang pananglitan magpositibo ang meat sample, magapatigayon sang banning sa pagkaon, pagbaligya, pagharvest, kag pagtransport sang panginhason.
Samtang kun magnegatibo naman magapadayon ang ila monitoring sa kadagatan nga sakop sang Capiz tubtob madula na ang red tide kag makadeklarar nga mahimo na magkaon sini.
Mahibaluan nagpatigayon sang water sampling ang Capiz Agri-Aqua Laboratory sang Setyembre 20-22 kag sa ila pag-analisar nakita ang presensya sang Pyrodinium bahamense, isa ka sahi sang organismo nga nagadala sang Paralytic Shellfish Poisoning ukon red tide kun sa diin positibo ang kalalawran sang Pilar kag Pres. Roxas.
Apisar wala na test ang iban nga kadagatan sa probinsya, ginkosiderar nalang nila ini kag gindala sa advisory para sa temprano nga aksyon.
Sa pihak nga bahin, ginsiling ni Dela Cruz nga ba-se sa impormasyon nagikan sa BFAR, positibo man sa red tide ang Isla Gigantes sa Carles.
Maayong balita naman bangud wala ginadumilian ang pagkaon sang isda, pasayan, kag alimango apang kinahanglan kuhaon lang ang hasang kag kutiba sa isda kag alimango samtang kuhaon naman ang ulo sang pasayanan bangud diri masami nagapilit ang nasambit nga organismo.
Matandaan tuig 2015 pa ulihi nga nagluntad ang red tide sa Capiz kag gin-athag ni Dela Cruz nga natural phenomenon ini gani indi nila mapakot kun tubtob san-o ini magadugay.
Panugyan sini sa pumuluyo nga sundon ang ginapaalinton sang gobyerno samtang ginahulat pa ang confirmatory test result.
