PILAR, CAPIZ – Ginkumpirma sang barangay kagawad sang Barangay Binaobawan, Pilar, Capiz nga volunteer lamang ini sang Bantay Dagat sa ila lugar.
Sa interview sang Bombo Radyo kay Brgy. Kagawad Rolando Bayaban ginpahayag sini nga indi siya miyembro sang Bantay Dagat apang naga-volunteer lamang ini sa tion nga magpatigayon sang operasyon sa pagpanakop sa mga nagapatigayon sang iligal nga pagpangisda sa kalalawran nga sakop sang nasambit nga banwa.
Ginpahayag pa ni Bayaban nga naga-upod lamang ini sa operasyon sa tion nga akaton ini sang hepe sang Bantay Dagat nga si Ernesto “Misoy” Cuñada.
Magluwas diri, suno kay Bayaban nga nakaupod man isa ka beses sa ila operasyon si Barangay Kagawad Christian Guzman bangud committee on fisheries man ini sa ila barangay.
Mahibaluan nga ginpa-blotter ni Renato Ligason nga empleyado sang munisipyo sa Pilar Municipal Police Station ang grupo nanday Bayaban, Guzman kag Warren Bonita bangud sa pagpanakop sa mga nagapatigayon sang iligal nga pagpangisda sa kalalawran nga sakop sang nasambit nga banwa nga indi man nila obligasyon kag wala sang otoridad para magpanakop sang mga iligalista sa kalalawran.
Gintadlong naman ni Pilar Municipal Administrator John Heredia nga ang legal nga gindesignar ni Mayor Arnold Perez bilang pinuno sang Bantay Dagat amo si Cuñada bangud nagapati ang alkalde sa kredibilidad kag integridad sini.
Gin-athag man ni Heredia nga miyembro sang Bantay Dagat si Ligason.
Dugang pa sini nga “first time in the history” sa ila banwa nga naglab-ot sa kapin P300,000 ang ila koleksyon kada bulan sa madinalag-on nga operasyon sang Bantay Dagat.
Samtang, ginpahayag ni Heredia nga indi malikawan nga may yara sang problema ukon isyu sa mga miyembro sang Bantay Dagat.
Apang, isa lamang ang ila katuyuan amo ang pagtapna sa mga iligalista sa kalalawran nga sakop sang ila banwa.
