ROXAS CITY – Padayon pa nga ginapadalman sang Bureau of Fire Protection ang ila nga imbestigasyon agud matumod kun sin-o ang yara sa likod sang pagpangsunog sa mga pamalay sang pamilya Begona sa Sitio Paon, Barangay Cogon, Roxas City.
Ini ang ginpahayag ni Fire Senior Inspector Stephen Jardeleza, ang City Fire Marshall sang Roxas City Fire Station sang mainterview sang Bombo Radyo.
Suno kay Jardeleza, tubtob sa karon wala pa matumod ang responsable sa nasambit nga insidente apang indi suno sa iya nila makompirmar kun matuod ang ginapahayag sang pamilya Begona nga engkanto ang may kahimuan sini bangud indi na ini sakop sang ila nga mandatu.
Ginpahayag ni Jardeleza nga ila ginarespeto ang pagpati sang pamilya nga posible engkanto ang may kahimuan sini apang suno sa opisyal magasentro lamang sila sa ila kaugalingon nga imbestigasyon kun sa diin naggaguha nga posible may yara sang hungod nga nagasuga sa mga pagkabutang sang pamilya Begona sa sulod sang ila balay.
Ginpahayag pa sini nga makonsiderar man nga fire prone area ang nasambit nga lugar rason nga nagpaandam ini sa kun sin-o man ang yara sa likod sang nasambit nga insidente nga untaton na sini ang iya ginahimo bangud magluwas sa nagahatag ini sang kakugmat sang mga residente, posible pa ini nga magtupok sa mga pamalay sa lugar kun indi gilayon matalupangdan ang kalayo.
