ROXAS CITY – Indi ‘satisfied’ si Board Member Besa sa nangin sabat sang National Grid Corporation of the Philippines sa ginpatigayon nga Public Hearing kahapon may kaangtanan sa natabo nga power outage sadtong Enero 2 tubtob 5 sini nga tuig.
Sa interview sang Bombo Radyo kay Board Member Jonathan Besa, Vice Chairman sang Committee on Transportation, Communication and Public Utilities, ginpahayag sini nga ‘unsatisfied’ siya sa nangin sabat sang NGCP bangud ginatudlo nila nga rason sang power outage amu ang mga powerplant kag generation sector sang power industry apisar klaro nga sila ang may sayop sandig man sa ginpresentar sang nagkalain-lain nga resource person.
Suno kay Besa indi lamang ang Capiz ang nagapangita sang hustisya sa natabo nga power outage kundi mangin ang kaiping nga probinsya sa Panay Island.
Ginpaathag ni Besa nga sa natabo nga power outage dako ang nangin kapierdehan sa ekonomiya sang probinsya kun pagabasehan ang gross domestic product sang 2022 kun sa diin ang daily income sang probinsya ang yara sa P204-M ukon P8.5-M per hour kag kun sumahon ang losses sini sa natabo nga blackout sang Enero 2 tubtob 5, yara ini sa 65 hour nga power interruption kag nakaangkon ini sang estimated loss nga P552-M.
Dugang pa sang opisyal nga nadiskubrehan man nga padayon ang pagbayad sang probinsya sa ancilliary services sang NGCP kun sa diin nagbayad pa sang nagligad nga tuig sang P101.7-M apang wala na ini ga-eksister nga serbisyo.
Ginpahayag pa ni Besa nga may plano na sila karon nga igaduso nga demand ukon resolution to impose penalty sa NGCP, isa diri amu ang pag-fast track nila sang imprastraktura ilabi na ang interconnection ukon mga submarine cable nga magakonektar halin sa Cebu to Negros kag padulong sa Panay Island agud indi na matabo ang power outage, subong man nga dapat i-refund sang NGCP ang ginabayad nga ancilliary services bangud wala man ini naga-exister, igarekomendar man sini ang separation sang grid operation ukon transmission provider network kag ang system operation agud madeterminar ang root cause sang problema sang blackout.
Ginpunto man ni Besa nga tama ka bilidhon ang elektrisidad sa probinsya bangud ang Capiz ang nagapaninguha sa pag-improve sang turismo kag ekonomiya gani dapat nga maresolba ang amu nga power outage.
Galaum man ini nga maka-come up ang ila kometiba sang mabakod nga resolution.
Mensahi sini sa pumuluyo nga ginatinguhaan nila nga maangkon ang hustiya kag wala nagakatulog ang opisyales sang probinsya sang Capiz ilabi na sa sini nga kaso sang power outage.
