ROXAS CITY – Gin-aprubahan na ang Annual Investment Plan amu man ang executive budget para sa tuig 2022.
Ini ang ginkumpirmar ni Hon. Jonathan “Sonny” Besa, Board Member sang Capiz sang ma-interview sang Bombo Radyo.
Suno kay Besa masadya siya bangud nakalusot na ini sa ila nga mga SP members bangud matandaan wala ini naaprubahan sa nakaligad nga administrasyon.
Ginsiling sang opisyal nga gintutukan ini sa sulod sang 2 bulan pinaagi sa pagbuliganay sang executive kag legislative department.
Gintuad sini nga ang pondo para sa program project activities nga pagapondohan gikan sa internal sources ang may kabug-usan nga balor sang masobra P2.371B, samtang kun kalakip naman ang external sources nagalab-ot ang pondo sa masobra P13.428B.
Dako naman suno diri ang gin-alokar nga pondo para sa mga ospital, bulig pinansyal, kag scholarship.
Luyag sini ipalab-ot nga bangud sa naaprubahan na ang pondo, magabalik na sa normal ang ila operasyon kag maga-improbar ang ila pagbulig sa pumuluyo sang probinsya kag nagapasalig siya sa mga empleyado sang RMPH nga igahatag na ang ila 2 months unpaid salary, sa Provincial Engineering Office nga naatrasar man ang weldo, kag differential kag adjustment naman sa sweldo sang mga empleyado sang gobyerno probinsyal.
