ROXAS CITY – Wala sang kalain sang buot si Capiz outgoing governor Antonio Del Rosario sa nangin kalutusan sini batuk kay outgoing vice-governor kag governor-elect Esteban ‘Nonoy’ Contreras sang nakaligad nga May 13 midterm elections.
Sa exclusive interview sang Bombo Radyo kay Del Rosario, ginpahayag sini nga hugot niya nga ginabaton ang iya nangin kalutusan.
Ginpahayag sini nga wala sang rason agud maglain ang iya buot bangud ginarespeto sini ang desisyon sang tawo nga tapuson na ang iya nga pagpangalagad bilang gobernador sang probinsiya.
Wala man suno sa iya sang problema sa iya kun madula siya sa patag sang pulitika bangud wala man ini nagaserbi nga iya palangabuhian kundi pagpanerbisyo sa pumuluyo lamang ang iya tinutuyo bilang opisyal sang gobyerno.
Wala naman direkta nga ginsabat ni Del Rosario ang ginpamangkot sa iya kun wala ini sang plano pa nga magsulod sa patag sang pulitika.
Ginpabugal man sini nga magabiya siya sa gobyerno-probinsiyal nga matinlo kag wala sang bahid sang korapsiyon.
Nagpahayag pa ini nga nakahanda siya nga magpaluthang kun may makapamatuod sa alegasyon nga korapsiyon batuk sa iya.
Sa 47 ka tuig sini bilang isa ka politician suno kay Del Rosario, anuman ang mga alegasyon nga ginahaboy batuk sa iya, lunsay wala ini napamatud-an bangud wala man ini tanan suno sa iya sang kamatuoran
