Capiz provincial government napasar ang 1st stage sang ISO 9001:2015 Certification; kapitolyo kag iban nga talatapan ready na para sa masunod nga stage

ROXAS CITY – Malipayon nga ginbakigbahin ni Atty. Luvim Amores nga napasar sang Capiz Provincial Government kag 5 ka government hospitals ang first stage sang International Organization for Standardization (ISO) 9001:2015 Certification.

Suno kay Atty. Amores, Public Information Officer sang gobyerno probinsyal indi madali ang na-agyan sang mga empleyado sang kapitolyo agud malab-ot ang requirements nga kinahanglan agud ma – ISO Certified ang opisina.

Ini ang ginakalakipan sang customer satisfaction, safety kag compliance sa statutory requirements.

Ang nasambit nga mga elemento ang kinahanglan agud mahibaluan kun nagasunod sa standardized procedure ukon alalangay nga paghatag sang serbisyo sa mga pumuluyo.

Sa karon, natalana nga igapaidalum subong nga adlaw sa stage 2 sang ISO Certification ang 5 ka government hospitals kag sa Nobyembre 30 naman ang provincial capitol.

Aminado si Amores nga nakulbaan apang ginasiguro sini nga antes magsabak sa audit ang mga department heads kag empleyado na-paidalum na ang mga ini sa nagakaigo nga training natuhoy sa implementasyon sang standardization.

Mahibaluan ang Capiz ang naga-isahanon nga provincial government sa bug-os nga rehiyon sang Western Visayas ang nag-apply agud mangin isa ka ISO-certified.