ROXAS CITY – Naghatag sang bugal sa probinsya sang Capiz kag sa Pilipinas ang Capizeña nga nakakuha sang mga medalya sa ginhiwat nga 15th ASEAN Taekwondo Championships 2022 sa Ho Chi Minh, Vietna, sang Abril 1, sini nga tuig.
Sa interview sang Bombo Radyo kay Mikee Rose Regala, kabahin sang Venancio Taekwondo Academy, suno diri nga malipayon ini sa napauli nga Bronze medal sa Womens Individual Standard Category kag isa pa ka bronze medal para sa pair category.
Nahibaluan nga indi ini ang labing-una nga kahigayunan nga nagpasakup si Regala sa pangkalibutanon nga kompetisyon, bangud sang tinalikdan nga mga tinuig, nagdaog ini sang bulawan nga medalya sa Kyurugie, sa 10th World Taekwondo Culture Expo 2016 sa pungsod South Korea.
Pamatuod gid lamang nga padayon ini nga naga-ensayo agud mangin mas dalubhasa pa sa patag sang Taekwondo.
Mensahe sini sa mga kabataan nga may huyog sa Taekwondo ukon bisan ano man nga sports, nga magapadayon sa ila luyag nga bulohaton kag indi madulaan sang paglaum sa handum.
