ROXAS CITY – Positibo ang chairman sang Committee on Environment sang Sangguniang Panlalawigan nga makalusot sa provincial board ang ginadihon nga committee report sang komite angut sa reinstatement sang 50 years mining moratorium sa probinsiya.
Malipayon nga ginsugid ni Board Member Mat Hachuela ang nangin resulta sang ginpatigayon nga committee hearing nga gintambungan sang magkatuhay nga mga stakeholders.
Suno sa opisyal nga ginadihon pa lamang sini ang report sang komite apang kumpyansa nga mabalik ang moratorium sa pagmina, bangud sa commitment kag suporta sang kapin walo ka mga kaupdanan sa provincial board nga ginalakipan nanday Board members Steve Contreras , Ricky Martin, Sonny Besa, Tambol Aplinario, BM Arevalo, ABC President ukon ex-officio member Querubin Pamplona, PCL President Ferdinand Baguio kag Vice Governor James Magbanua.
Ginpahayag ni Hachuela nga ginapanindugan sini ang pagbawal sang pagmina sa probinsiya, bangud ginakabig nga development area ang Capiz gani dapat wala sang mining activities diri.
Ginapanindugan sini nga apisar may mining law, indi ini maglabaw ang mga polisiya nga ginapatuman nga nagahatag sang proteksyon sa dunang manggad sang probinsiya.
Nagapati ang BM nga isa lamang ang ginasinggitan kun mining ang estoryahan kag ini amo ang paghatag proteksyon sa dunang manggad kag palibot.
