BOMBO ROXAS – Ginalauman sang mga konsehal sang Sangguniang Panlungsod nga maaprubahan ni Roxas City Mayor Ronnie Dadivas ang ginpapasar nga Anti-Half Naked Oridinance nga nagadumili sa mga pumuluyo nga mag-uba sang bayo sa pampubliko nga mga lugar.
Ini ang ginapahayag ni City Councilor Jericho Angel Celino sang mainterview sang Bombo Radyo Roxas.
Suno kay Celino nga may yara sang pila ka mga pumuluyo sa duha ka mga kabarangayan sa syudad sang Roxas ang nagpalab-ot sang reklamo angut sa madamo nga mga kalalakinhan nga nagalakat sa mga dalanon nga wala sang pang-ibabaw nga panapton.
Suno kay Celino nga may ginpalab-ot nga reklamo ang pila ka mga kababainhan kun sa diin luyag kun tani nga magpadulong sa mga tindahan agud magbakal apang nagabatyag na lamang sang pagkailang bangud sa mga kalalakinhan nga wala sang pang-ibabaw nga bayo.
Suno kay Celino nga naghimo ini sang pamaagi bilang sabat sa mga reklamo ga ginapalab-ot sang mga pumuluyo.
Dugang pa sini nga may gin-basehan ini nga mga ordinansa antes nadesisyon nga ipresentar sa konseho kag mapasar bilang ordinansa.
Ginpatpat man sini ang pila ka mga exemptions sa ginabawal nga pag-uba sang bayo kalakip sa publiko kag mga penalidad sa tion nga may magalapas.
