ROXAS CITY – Ginpatpat sang City Engineering Office ang proseso sang pagkuha sang permit sang mga balay-ilimnan kag mga KTV bars sa siyudad agud mangin legal ang ila nga operasyon.
Suno kay City Engineer Rosano Anisco, antes sila magpatigayon sang inspeksiyon, nagaagi pa ang tag-iya sang nasambit nga mga establisyemento sa zoning office para sa ila paggawad sang business permit.
Ginpahayag sini nga ginatsekyar sang mga katapo sang City Engineering Office ang electrical kag mismo ang building sang KTV Bar kag mga balay-ilimnan.
Ginapanindugan ni Anisco nga wala nila gina-aprubahan ang permit sang mga tag-iya kun may makita sila nga problema sa ila pagpatigayon sang inspeksiyon.
Sa karon suno kay Anisco may yara pa lamang sang anum ka mga KTV Bars kag balay-ilimnan nga naga-proseso sang ila nga permit kag yara naman sa ila nga talatapan.
Nakahanda man si Anisco nga mag-upod sa kawsa sang siyudad nga magpatigayon sang inspeksiyon agud matapna ang mga balay-ilimnan kag KTV bars nga ilegal ang operasyon.
