ROXAS CITY – Ginakabig sang City Environment and Natural Resources Office (CENRO) nga illegal ang operasyon sang Sanitary Landfill sa Sitio Gumba, Barangay San Jose, Roxas City.
Ini ang ginkumpirmar ni City Environment and Natural Resources Officer (CENRO) Engineer Magarita Maestro sang ma-interview sang Bombo Radyo.
Suno kay Engr. Maestro nga illegal nga naga-operate ang sanitary landfill bangud wala sang ginauyatan nga discharge permit nga gikan sa Environmental Management Bureau para sa leaches nga nagadiretso sa sapa.
Ginpanindugan ni Maestro nga wala matapos sang contractor nga Bacolod based ang pag-ubra sang waste water treatment plant para sa sanitary landfill kag humalin sadto wala na makabalik ang contractor.
Ginpanugyanan ni Maestro ang mga katapo sang solid waste management nga kinahanglan magkuha sang discharge permit gikan sa EMB humalin sang nagsugod ang operasyon sang Sanitary Landfill sang tuig 2017 apang wala man ini ginpatihan.
Aminado si Maestro nga wala ini sang may mahimu bangud sang tion nga ginbuksan ang sanitary landfill floating pa lamang ang iya status sa CENRO.
Gin-athag ni Maestro nga kapareho nga wala sang kinalain ang sanitary landfill sa open dumpsite rason nga kinahanglan sang city government nga magtukod sang panibag-o nga sanitary landfill.
