Wala naapektuhan ang pag-eskwela sang mga kabataan matapos ang asud-asud nga ginpatuman nga suspension of classes sa mga kabanwahanan sa probinsya sang Capiz.
Sa interview sang Bombo Radyo kay Ms.Yzarda Claudette D. Ballera, ang Project Development Officer 1 sang DEPED-Capiz Division, ginpahayag sini nga sa mga kasubong sini nga sitwasyon nga may bagyo nga gapanglaslas sa lugar kag may ginapatuman nga class suspension sa tagsa ka mga kabanwahanan, awtomatiko nga nagapatuman sang alternative delivery mode of instruction ukon gapatuman ang ahensya sang modular mode of learning para sa mga estudyante.
Suno kay Ballera, sa padayon nga pag-monitor sang DRRM Officers sang ahensya sa mga buluthuan, wala sang may nabalhag nga nabahaan nga buluthuan sa probinsya.
Wala man suno diri naapektuhan ang calendar of activities sang mga estudyante bangud padayon sa gihapon ang tulun-an bangud sa distance learning ukon modular.
Panugyan ni Ballera, sa mga kasubong nga sitwasyon dako ang bulig sang mga ginikanan pinaagi sa pag-monitor sa ila kabataan kun ini sila ang gatuon pinaagi sa distance learning agud nga kun ini sila ang magbalik na sa pormal ang klase, indi sila mabilin.
