ROXAS CITY – Nagapabilin sa karon ang hugot nga pagbantay sang mga opisyales sang Barangay Baybay, Roxas City sa compound nga gina-estaran sang isa nila ka residente nga nag-positibo sa coronavirus disease (COVID-19).
Ini ang ginpahayag ni Punong Barangay Reynaldo Magallanes sang mainterview sang Bombo Radyo.
Suno kay Magallanes nga ginpahamtangan sang mga katapo sang Barangay Health Emergency Response Team (BHERT), barangay tanod kag officials ang guwa sang balay sang 64 anyos nga lalaki nga naga-trabaho sa Libas fishing port.
Ini agud malikawan ang pagguwa-sulod sa amo nga lugar kag malikawan ang posible paglapta sang virus.
Gilayon man suno diri nga ginpaidalom sa real-time polymerase chain reaction (RT-PCR) test ang pamilya sang nasambit nga persona nga makabig nga iya naka-close contact.
Ginklaro man ni Magallanes nga balay kag opisina lamang ang mga napadulungan sang nasambit nga lalaki antes ini nag-positibo sa nasambit nga balatian.
Apang sa karon suno sa iya, padayon pa ang ila pagpangusisa agud matumod ang iban pa nga persona nga close-contacts sang nasambit nga COVID-19 positive.
Mahibaluan nga sadtong Agosto 12 sang nakabatyag sang hilanat ang nasambit nga pasyente rason nga nagpaidalom ini sa home-quarantine.
Agosto 15 naman sang nagsaylo ini sa quarantine facility kag nagpaidalum sa swab testing.
Sa karon, nagapabilin ini nga naka-admit sa Roxas Memorial Provincial Hospital ukon RMPH.
