ROXAS CITY, CAPIZ- Gin-athag ni Roxas City Councilor Midelo Ocampo, nga bangud sa indi pagsanto sang iskedyul napaslawan ini nga makatambong sa ginpatigayon nga Philippine Councilors League (PCL) Capiz Provincial Chapter Election sang Hulyo 30, 2025.
Sa interview sang Bombo Radyo, ginpahayag ni Ocampo nga nagdungan sa iya nga padulungan nga seminar sa syudad sang Iloilo ang amo nga election sang PCL Provincial Chapter.
Dugang pa sini, ang amo nga seminar sa Iloilo ang may kaangtanan sa iya Chairmanship sa Committee on Housing/Urban Poor kag Committee on Zoning and Land Use Development, sa diin amo ang “Enhancing Competence in Subdivision Plan Approval and Development Permit Issuance Seminar” sang Department of Human Settlements and Urban Development (DHSUD) umpisa Hulyo 30 tubtob Agosto 1, 2025.
Ginklaro man sini nga wala sang may natabo nga pag boycot bangud lunsay man nila kaalyado sa One Capiz ang kadamuan nga mga partisipante.
Samtang, nanugon man si City Councilor Ocampo nga wala ini nakatambong kag wala naka-boto apang ginpalab-ot sini ang dako nga pagpanginbulahan sa ba-o nga naeliher nga Presidente kag mga opisyales sang PCL Capiz Chapter.
Interviewed by Bombo Sunnie Mae Batencila
