ROXAS CITY – Ang kagustuhan nga makabulig sa mga pumuluyo sa syudad sang Roxas kag probinsiya sang Capiz ang nagtulod sa kongresista sa segundo distrito sang probinsiya agud personal nga bisitahan si Mayor Ronnie Dadivas sa iya nga talatapan sang damlag lang kag magtanyag sang iya nga bulig.
Ginpahayag ni Congressman Fredinil Castro nga nakita kag naobserbahan sini nga isa sa problema sang syudad amo ang kakulang kag indi maayo nga suplay sang tubig nga gikan sa Metro Roxas Water District.
Suno sa opisyal nga indi mag-umwad ang isa ka negosyo kun indi bastante ang tubig.
Gani sang nakakita sang kahigayunan ang kongresista, gin-upod sini ang isa ka investor nga handa magbulig sa Roxas City.
Ginpaathag pa ni Castro nga luyag sini nga mabuligan ang administrasyon ni Mayor Ronnie Dadivas kag sa iya nga pagpati nga daku ang mabulig sini para masolusyunan ang mga reklamo sang mga kunsumidor nga kakulang sang suplay kag maayo nga kalidad sang tubig.
Nahibaluan nga ginhambalan ni Castro ang investor sang isa ka kumpaniya nga antes magpadulong sa iban nga parte sang Rehiyon 6, bisitahan sini ang Capiz.
Ginpasiguro pa sang kongresista nga indi lamang ang Roxas City ang makabenepisyo sang maayo nga suplay sang tubig, kundi kalakip ang kaingud nga mga kaprobinsiyahanan.
Pananglitan nga magkasugot, ang nasambit nga kumpaniya amo ang magasto sa pagkaayo sa facilidad sang MRWD. Samtang wala man nalikawan ni Castro nga magpabati bati sa iban nga mga personalidad nga nagahatag sang malisya sa iya pagpakigkita kay Mayor Dadivas.
Suno sa kongresista nga indi lamang nasentro sa segundo distrito ang iya pagbulig kundi kalakip sang iya nabuligan kag napahamtangan sang proyekto ang yara sa kabanwahanan sa premier distrito sang probinsiya.
Ginapanindugan sang kongresista nga matinlo ang iya konsensiya nga pag-ulikid kag pagpalangga lamang sa mga Capizeño ang rason sang iya pagbulig.
