ROXAS CITY, CAPIZ- Tuman ang pagpasalamat sang isa ka graduating student sa flower vendor nga naghatag sang libre nga flower bouquet sa iya amay para sa iya sa adlaw sang ila nga Recognition Day.
Sa interview sang Bombo Radyo kay Marisol Dorado, manog- gradwar bilang Cum Laude sa kurso nga Bachelor of Secondary Education (BSEd) major in Filipino sa Capiz State University (CAPSU) Main Campus, ginpahayag nga wala nya ginalauman nga hatagan sya sang flower bouquet sang iya nga amay sang tion nga nagsaka na sila sa stage agud batunon ang medalya.
Dugang pa sini, indi ini ang first time nga nakabaton sya sang bulak halin sa iya amay, bangud nga sang pinning ceremony, nakabaton na ini sya kag amo ang una nga kahigayunan kun sa diin gamay lang suno sa iya ang amo nga bulak, kag nakibot sya nga sang recognition day, may bulak naman nga bitbit ang iya amay kag tuman ka dako para sa iya.
Samtang, pahayag pa ni Dorado, nakibot siya sang may nag-tag sa iya sa isa ka social media post kun sa diin didto kag nahibaluan nya nga ang bulak nga ginhatag sang iya nga amay, ang ginhatag man sang libre ni Miss Kaii Ally, nga isa ka flower vendor.
Bangud sini, gintinguhaan pa ni Marisol kag sang iya nga pamilya nga kadtuan si Miss Kaii agud kuntani personal nga mapasalamatan, apang suno sa iya wala na nila ini maabtan kag nagpabutyag man sya sang pagpasalamat pamaagi sa pag chat sa nasambit nga flower vendor.
Nahibaluan nga natalana sa Hunyo 18, 2025 ang ila nga graduation day.
Nagpalab-ot man sang pagpasalamat si Marisol sa iya nga amay, kag bug-os nga pamilya, kag sa tanan nga mga tawo nga nangin parte sang iya napagkit nga kadalag-an.
With a report from Bombo Jessa Mae De Los Santos
