ROXAS CITY, CAPIZ- Ginpa-bombo sang pila ka mga pumuluyo sang Barangay Libas, Roxas City ang ila nga Daycare Worker nga si Regielyn Besana bangud sa ginapahayag pagpanghawhaw sini sang lista sang mga pumuluyo nga madala sa hatagan sang ayuda.
Sa interview sang Bombo Radyo kay Heidi Alaniz, pumuluyo sang nasambit nga barangay, iya ginpahayag nga sa ila nga pagkabalo, yara ang ila nga mga pangalan sa listahan sang makabaton sang ayuda, apang sang tion nga nagpadulong na ini sila sa lugar sa diin nga ginapatigayon ang releasing, nakibot na sila bangud nga wala na ang ila nga mga pangalan sa listahan.
Suno sa ila, kaangay nga indi maayo ang nasambit nga sistema, bangud nga sa ila nga pagpati, kun ano ang ara na sa listahan, indi na ini pwede nga liwaton pa.
Pahayag nila nagpadulong sila sa talatapan sang Department of Social Welfare and Development(DSWD) agud kuntani nga maathagan apang ginsiling ini sa ila nga sa barangay ang problema kag indi ang sa DSWD.
Nagapanawagan sa subong ang mga pumuluyo nga kuntani ibalik ang ila nga pangalan sa listahan bangud nga suno sa ila, dako na nga bulig ang amo nga kantidad.
Samtang, bukas naman ang istasyon sang Bombo Radyo Roxas para sa pagpaathag sang mga indibidwal nga ginpa-bombo.
Interviewed by Bombo Sunnie Mae Constantino Batencila
