ROXAS CITY – Nagaisahanon ang Department of Education Region 6 nga may Regional Achivement Measure (RAM) sa bilog nga pungsod.
Sa interview sang Bombo Radyo kay Mr. Hernani Escullar, Spokesperson sang DepEd Region 6, iya ginpahayag nga ang RAM ang isa ka assessment sa diin ginahatagan sang examination ang mga estudyante sa Grade 1 tubtob Grade 12 sa tanan nga buluthuan sa Western Visayas agud mahibaluan pinaagi sa resulta kun ano ang himuon nga mga intervention.
Suno kay Escullar, target sang amo nga programa nga mapasangkad ang literacy kag numeracy sang mga kabataan.
Matandaan nga ginbuyagyag sang Philippine Statistics Authority (PSA) nga 18.96 million sang Pilipino nga estudyante nga naggradwar sang senior kag junior high school sang 2024 ang indi kabalo magbasa kag mahina ang reading comprehension.
Ginpasiguro naman ni Escullar nga ginahimo sang DepEd Region VI ang tanan nga effort agud mapasiguro nga ang mga kabataan literate kag numerate, kag mahatagan sang quality basic education.
