Ginpanindugan sang Department of Justice (DOJ) nga indi ‘personality driven’ ang ila imbestigasyon sa kaso sang nadula nga mga sabungero ukon bisan pa nga ginatumod sa isa ka partikular nga grupo ukon indibidwal.
Sa isa ka interview, ginhatagan pagtamod ni Justice Undersecretary Raul Vasquez nga wala sila sang sin-o man nga personalidad nga ginatumod sa ila nagapadayon nga imbestigasyon.
Suno sa iya, kun ano man ang resulta kag konsekwensya sang imbestigasyon, nagakahulugan lamang ini nga siya ang ginatudlo sang mga ebidensya kag una nga nadalahig sa kaso.
Ginpahayag ni Vasquez nga wala sang personal nga agenda sa imbestigasyon kag ginahimo lang nila ang ila trabaho.
Ginkumpirmar man ni Vasquez nga magapadayon ang pagtipon sang mga otoridad sang mga ebidensya may kaangtanan sa kaso sang nadula nga mga sabungero.
Tinutuyo sini nga mapabaskog pa gid ang ila mga kaso nga mahimo nila mapasaka sa korte batuk sa mga personalidad nga mahimo matumod nga yara sa likod sini.
Samtang, ginmanduan na ni Presidente Ferdinand Marcos Jr ang mga otoridad nga magpatigayon sang maid-id nga imbestigasyon sa nasambit nga kaso agud masigurado nga manabat sa kasuguan ang mga yara sa likod sang krimen.
