Ginpanugyanan sang Department of Labor and Employment ang mga pribado nga kumpaniya nahanungod sa insakto nga pasweldo sa mga nagahilapit nga regular kag special holiday subong nga Disyembre.
Mahibaluan nga sa idalom sang Labor Advisory No. 14, Series of 2024, ang Dec. 8, Dec. 24 kag Dec. 31 ang pareho nga mga special non-working holidays.
Gintumod naman bilang regular holiday ang Dec. 25 (Adlaw sang Paskwa) kag Dec. 30 (Rizal Day).
Sa tatlo ka adlaw nga special non-working holidays, pagasundon diri ang ‘no work, no pay’ principle. Apang para sa mga magatrabaho sa mga nasambit nga adlaw, dugang nga 30% ang ila nga mabaton, magluwas pa sa overtime pay kun sa tion nga mag-overtime ang isa ka empleyado.
Sa duha nga regular holidays, magasulod naman ang double pay sa mga empleyado nga magatrabaho samtang ang mga empleyado nga indi mag-ubra ang makabaton sa gihapon sang 100% sang ila regular nga sweldo.
Sulod man diri ang dugang nga overtime pay para sa mga empleyado nga magatrabaho.
Ginhimo sang DOLE ang pahanumdom bilang guidance sa mga employer, kadungan sang lima ka adlaw nga special kag regular holiday sa sulod lamang sang bulan sang Disyembre.
