ROXAS CITY – Kampante ang Department of Labor and Employment (DOLE)-6 nga maaprubahan sang National Wages and Productivity Commission (NWPC) ang P450 nga minimum wage sa Western Visayas.
Sa interview sang Bombo Radyo kay Atty. Sixto Rodriguez Jr., regional director sang DOLE-6, suno diri nga P750 ang ‘original demand’ sang mga labor group, apang tuman ini ka bug-at para sa mga employer, rason nga natigayon nga madesisyunan sang Regional Tripartite Wages and Productivity Board (RTWPB) – 6 ang P450, bangud kapin 3 na ka-tuig nga wala nakapataas sang suweldo sa rehiyon sais.
Pila sa mga factor nga gin-aprubahan ang nasambit nga kantidad bangud sa padayon nga pagtaas sang gatong kag nagapanguna nga balaklon, dugangan pa sang epekto sa ekonomiya sang nagapadayon nga giyera sa Russia kag Ukraine.
Nahibaluan nga sa tion nga maaprubahan sang NWPC ang endorsement sang RTWPB-6, magapaguwa sang issuance order ang ahensya kag 15-diyas pagkatapos masapubliko, mangin-epektibo na ang pagtaas sang suweldo.
Matandaan nga nagikan sa minimum wage nga P395 mangin P450 na ini para sa mga non-agricultural/industrial/commercial nga empleyado, samtang ang P315 nga daily minimum pay sa agriculture sector mangin P410, kag P4,000 tubtob P4,500 na ang minimum pay sa mga kabulig sa balay.
Ginapahayag nga sa masunod nga semana ini natalana nga pagatalakayon sang NWPC.
