ROXAS CITY -Ginkompirmar sang hepe sang Maintenance and Construction Division sang Department of Public Works and Highways (DWPH) Capiz 1st Engineering District nga gin-implementar na sang DPWH-Region 6 ang writ of possession sa porsyon sang duta sang pamilya Tan nga kabahin sang 9.1 Kilometer nga Roxas City Circumferential Road sa Barangay Balijuagan Roxas City.
Ini ang ginpahayag ni Engr. Julius Abela sang mainterview sang Bombo Radyo.
Ginpahayag ni Abela nga mahimo na nga matapos ang nasambit nga proyekto kag matigayon na nga makonekta sa national highway sang Barangay Balijuagan.
Suno kay Abela nga kapin 2,681 sq. meters ang maapektuhan sa porsyon sang duta ni Grace Gaurino samtang kapin 2,509 sq. meters naman ang maapektuhan nga porsyon sang duta ni Charise Tan.
Apang gin-athag ni Abela nga may yara sang just compensation nga mabaton ang pamilya Tan sa naapektuhan nila nga duta.
Samtang ginalauman naman ni Abela nga matapos subong nga tuig ang circumferential road kasunod sang pag-implementar sang writ of possession.
Matandaan nga nagtuga sang pagka-atrasar sa konstruksyon sang circumferential road ang pagpakatig-a sang pamilya Tan nga ibaligya ang porsyon sang duta nga paga-agyan sang nasambit nga karsada.
Apang sang tuig 2018 nag-file ang DPWH Region 6 sang expropriation proceedings sa korte batuk sa pamilya Tan sa diin ginpaboran man ini sang korte.
