Napiyongan kag ginapahayag nga wala nadiparahan sang 21-anyos nga driver sang motorsiklo ang naga-backing nga truck sa Barangay San Jose, Dumalag, Capiz.
Ginkilala ang driver sang motorsiklo kay alyas “Archie”, residente sang Brgy. Ayuyan, Dumalag, Capiz, samtang ginkilala naman ang driver sang truck kay alyas “Jhon”, yara sa legal nga pang-edaron nga residente naman sang Brgy. Sta. Monica sa amo man nga banwa.
Sa interview sang Bombo Radyo kay PSSG. Christopher James Badilla, imbestigador sang Dumalag MPS, ginpahayag sini nga naga-backing ang truck sang ini ang ginapahayag ginbungguan ni Archie nga nagikan sa Brgy. Poblacion kag padulong kuntani sa Brgy. Ayuyan, rason nga natumba ini kag nag-angkon sang mga pilas sa kalawasan sini.
Nahibaluan nga yara sa impluwensya sang makahulubog nga ilimnon si Archie kag ginapahayag wala sang suga ang motorsiklo sini nga madasig pa ang pagmaneho sini.
Bangud sa natabo nga insidente, gilayon nga gindala sa Dao District Hospital si Archie para sa nagakaigo nga pagbulong, samtang ang duha naman ka mga salakyan ang yara sa karon sa kustodiya sang Dumalag Municipal Police Station para sa nagakaigo nga disposisyon.
