Negatibo ang resulta sang drug test sang tricycle driver nga ginsugo magdul-ong sang pagkaon sa isa ka priso sa Capiz Rehabilitation Center.
Sa pagkig-angut sang Bombo Radyo kay Roxas City PNP Chief Police Lieutenant Colonel Lumyaen Lidawan, apisar negatibo sa drug test ang driver, nag-positibo naman ang droga nga nakasulod sa chichirya nga ginpadala sa iya padulong sa CRC kag ginpasakaan ini sa gihapon sang kaso ang amu nga driver sang tricycle.
Gintuad naman sang driver sa kapulisan nga wala ini naga-enggaged sa iligal nga droga kag madugay na nga tricycle driver ang iya sini pangabuhianan.
Naka-detain subong sa Roxas City Police Station ang driver samtang ginahulat ang mangin resulta kun ipasaka sa korte ang kaso.
Matandaan nga natigayon nga makuha sang mga security guard ang duha (2) ka sachets sang ginaalegar shabu nga nakasulod sa chichirya nga ginpadul-ong sa tricycle driver sang wala pa makilan-an nga babayi nga para kuntani sa isa ka priso sa sulod sang CRC.
Naglab-ot sa mas ukon menos 5 grams ang kabug-aton sang amu nga droga kag may Standard Drug Price nga P34,000.
Nagapadayon pa sa karon ang imbestigasyon sang kapulisan bangud palamangkutanon sa gihapon kun sin-o ang babayi nga nagpadala sang item sa amu nga tricycle driver kabaylo sang P50.00 nga plete.
